ប្រែសម្រួល៖ ស.សម្បត្តិ
អគ្គិភ័យដ៏ធំមួយបានផ្ទុះឡើងក្នុងផ្ទះវីឡាតម្លៃ៤លានដុល្លារនៅរដ្ឋ Connecticut បន្ទាប់ពីអ្នករស់នៅបានព្យាយាមចំអិនមាន់តាមវិធីបំពង (fry) នៅក្នុងចំណតរថយន្តនៅថ្ងៃបុណ្យ Thanksgiving។
អ្នកពន្លត់អគ្គិភ័យបានជួបប្រទះបញ្ហាប្រឈមជាច្រើននៅរសៀលថ្ងៃបុណ្យនេះ បន្ទាប់ពីផ្ទះវីឡាដ៏ស្រស់ស្អាតនៅផ្លូវលេខ៤០ Weston ក្នុងតំបន់ Weston , សហរដ្ឋអាមេរិកបានឆេះសន្ធោសន្ធៅ។
អណ្តាតភ្លើងដ៏កាចសាហាវបានរាលដាលយ៉ាងឆាប់រហ័សពេញផ្ទះ ហើយមិនយូរប៉ុន្មាន ការបាក់រលំនៃរចនាសម្ព័ន្ធអគារបានបង្កើតស្ថានភាពគ្រោះថ្នាក់សម្រាប់អ្នកពន្លត់អគ្គិភ័យដែលកំពុងឆ្លើយតប។
អ្នករស់នៅកំពុងព្យាយាមចំអិនមាន់សម្រាប់អាហារពេលថ្ងៃត្រង់នៅថ្ងៃព្រហស្បតិ៍ នៅពេលដែលចំណតរថយន្តបានឆាបឆេះ និងចាប់ផ្តើមរាលដាលយ៉ាងលឿនចូលទៅក្នុងផ្ទះ យោងតាមក្រុមអ្នកពន្លត់អគ្គិភ័យស្ម័គ្រចិត្ត Weston។
“អ្នកពន្លត់អគ្គិភ័យបានព្យាយាមប្រយុទ្ធនឹងភ្លើងយ៉ាងសកម្ម ប៉ុន្តែកិច្ចខិតខំប្រឹងប្រែងរបស់ពួកគេត្រូវបានរារាំងដោយស្ថានភាពភ្លើងដ៏គ្រោះថ្នាក់ និងការបាក់រលំនៃរចនាសម្ព័ន្ធអគារ” នេះជាសេចក្តីថ្លែងការណ៍របស់ក្រុមអ្នកពន្លត់អគ្គិភ័យដែលបានប្រយុទ្ធនឹងអណ្តាតភ្លើងអស់រយៈពេល១៦ម៉ោង ដែលបានសរសេរនៅលើបណ្តាញ Facebook។
បន្ថែមលើអណ្តាតភ្លើងដ៏ធំដែលឆេះឆាបឆេះផ្ទះនោះ អ្នកឆ្លើយតបដំបូងបានជួបឧបសគ្គធំមួយនៅពេលដែលលំហូរទឹកបានឈប់អស់រយៈពេល “ប៉ុន្មាននាទី” បន្ទាប់ពី “រថយន្តមួយបានបើកកាត់ទុយោទឹក” ធ្វើឲ្យខូចខាត។
អត្តសញ្ញាណរបស់អ្នកចំអិនមាន់មិនត្រូវបានផ្សព្វផ្សាយដោយអាជ្ញាធរទេ ប៉ុន្តែផ្ទះនេះជាកម្មសិទ្ធិរបស់លោក Thomas H. Shrager នាយកគ្រប់គ្រងក្រុមហ៊ុន Tweedy, Brown យោងតាមកំណត់ត្រាសាធារណៈ។
រូបភាពដែលបានចេញផ្សាយដោយក្រុមអ្នកពន្លត់អគ្គិភ័យបង្ហាញពីអណ្តាតភ្លើងដ៏ធំដែលឆេះឆាបឆេះផ្ទះ និងលាតសន្ធឹងច្រើនហ្វីតនៅខាងក្រៅផ្ទះតាមបង្អួចដែលបែកបាក់។
ផ្ទះទាំងមូលត្រូវបានលេបត្របាក់ដោយអណ្តាតភ្លើងពណ៌ទឹកក្រូច ហើយផ្សែងខ្មៅក្រាស់បានហុយពេញអាកាស។
វីដេអូនៃអគ្គិភ័យដែលបានបង្ហោះដោយអ្នកផ្តល់មតិម្នាក់ បង្ហាញពីរលកអណ្តាតភ្លើងពណ៌ទឹកក្រូចដ៏គួរឱ្យខ្លាចដែលភ្លឺចែងចាំងតាមដើមឈើនៅតាមដងផ្លូវ ខណៈពេលដែលមេឃក្លាយជាខ្មៅដោយសារផ្សែងនៅម៉ោងប្រមាណ៥ល្ងាច។
អគ្គិភ័យបានចាប់ផ្តើមមុនម៉ោង៤ល្ងាចបន្តិច។
ផ្ទះនៅ Weston ដែលស្ថិតនៅប្រមាណ៣០ម៉ាយល៍ពីក្រុង New Haven ត្រូវបានចាត់ទុកថា “មិនអាចរស់នៅបាន”។
ទោះបីជាមានរូបភាពដ៏គួរឱ្យរន្ធត់នៃអគ្គិភ័យក៏ដោយ ក៏មិនមានរបាយការណ៍អំពីការរងរបួសណាមួយទេ។
ទោះយ៉ាងណា នៅមិនទាន់ច្បាស់នៅឡើយទេថាមានមនុស្សប៉ុន្មាននាក់នៅក្នុងផ្ទះនៅពេលដែលភ្លើងឆេះចំណតរថយន្តចាប់ផ្តើម។
ក្រុមអ្នកពន្លត់អគ្គិភ័យប្រាំមួយក្រុមផ្សេងទៀតត្រូវបានជួយដល់ក្រុមអ្នកស្ម័គ្រចិត្ត ខណៈពេលដែលក្រុមអ្នកពន្លត់អគ្គិភ័យ Ridgefield បានផ្តល់ការគ្របដណ្តប់ក្នុងទីក្រុង ខណៈពេលដែលក្រុម Weston កំពុងប្រយុទ្ធនឹងអគ្គិភ័យនៅផ្ទះវីឡានោះ។
មូលហេតុផ្លូវការនៃអគ្គិភ័យនេះនៅតែស្ថិតក្រោមការស៊ើបអង្កេតនៅឡើយ ប៉ុន្តែការស៊ើបអង្កេតបឋមបង្ហាញថាវាជាលទ្ធផលនៃការព្យាយាមចំអិនមាន់។
នៅថ្ងៃបុណ្យ Thanksgiving នេះ វិធីចំអិនមាន់ចម្លែកៗជាច្រើនបានរីកសាយភាយនៅលើបណ្តាញសង្គម។
អ្នកមានឥទ្ធិពលម្នាក់បានទទួលការខឹងសម្បាពីអ្នកតាមដានរបស់គាត់ បន្ទាប់ពីដាក់គ្រឿងទេសមាន់ឆៅក្នុងបង្គន់មុនពេលយកទៅចំអិនឱ្យភ្ញៀវរបស់គាត់បរិភោគ។
អ្នកចំអិនដែលពាក់ព័ន្ធ គឺ Kate Heintzelman មកពីរដ្ឋ Minnesota បានគប់មាន់ឆៅចូលទៅក្នុងបង្គន់មុនពេលដាក់គ្រឿងទេស និងស៊កគ្រឿងទេស ដែលនាំឱ្យមានការចុច Like ចំនួន៥.៨០០ នៅលើ Instagram។
ដោយឡែក លោក Robert F Kennedy Jr. ក៏បានបង្កើតការភ្ញាក់ផ្អើលនៅលើបណ្តាញសង្គមផងដែរ ដោយការបំពងមាន់ និងយកមាន់ចេញពីឆ្នាំងដោយមិនពាក់ស្បែកជើងទេ៕
